Randhy Cuevas a subi Seru Kristòf 15 biaha

16-01-2017
Randhy Cuevas a subi Seru Kristòf 15 biaha

WILLEMSTAD – Ayera, djadumingu e deportista lokal Randhy Cuevas a subi Seru Kristòf 15 biaha – 2 be mas ku e 13 biahanan ku tabatin programá. Ademas, el a logra esei hopi mas rápido ku e mes a kalkulá. Ora el a finalisá su hazaña ku 15 biaha, presidente Robbin Martina di fundashon di Ride for the Roses a risibi’é ku un bukèt di rosa komo gesto di gratitut pa su kontribushon na e bon kousa. Randhy Cuevas ku su akto deportivo aki a logra rekoudá sigur 25 mil florin.

Djis despues di 12 or di anochi, Randhy Cuevas a kuminsá ku su promé subida. Ora el a subi den mardugá pa di 6 be, esei a marka alabes e di 4000 biaha ku Randhy Cuevas a subi e seru aki, loke riba su mes ya ta un sifra impreshonante. Pero el a sigui. Ora el a baha pa di 8 biaha, tabatin un di e promé gruponan, inkluso diferente turista, ku riba nan mes tambe a subi. Nan a saka potrèt kuné komo sosten. Kada be ku e tabata regresá abou, tabata kontrolá su estado di salú i su ánimo, pero e no a kansa. Den mardugá el a sinti si hopi friu. Si no tabata pa e friu, kisas lo el a subi i baha hasta mas tantu be. 

Mainta tempran a prepará un bon sòpi pa tene e kurpa kayente i den kondishon, tambe di esnan ku tabata kompañ’é. Ora dia a habri, por a graba parti di su trayekto tambe ku un drone, anke no te riba tòp di e seru, pasobra e áwaseru di último lunanan a pone ku e vegetashon ta hopi será. Ora Randhy a alkansá 13 biaha alrededor di 1 or, el a laga sa ku e no ta stòp ainda. El a yega 13 pa Ride for the Roses, pero el a subi dos be mas pa e mes.

Finalmente, kuartu pasá di 3 el a finalisá e di 15 biaha tambe. RFTRC presidente Robbin Martina a entregá Randhy Cuevas un bukèt di 15 rosa – 13 blanku i 2 kòrá, pa e tremendo prestashon. Presente tabata tambe un grupo di representante di RFTRC, di Fondo Prinsesa Wilhelmina bou di guia di presidente Alba Martijn, diferente sostenedó di Randhy bou di liderato di Emerik Angela, Krus Kòrá, Marina Real, Parke Kristòf, algun medio di komunikashon i otro interesadonan. Klaro ku tur kaminda tabatin masha apresio pa e logro aki di Randhy Cuevas. El a demostrá kiko ke men bai pa un meta i perseverá pa alkansá esei tambe, hasiendo esfuerso grandi pa superá e difikultatnan. El a demostrá un biaha mas un karakter hopi fuerte i asina el a kontribuí en grande na e bon kousa di Ride for the Roses. De paso, e logro finansiero di Randhy tambe a surpasá e loke a pone komo meta. A bai pa 13 mil florin por lo ménos i danki na Randhy e suma aki a alkansá 25 mil florin. Un danki ta bai di RFTRC na Randhy mes i su ayudantenan, na tur voluntario i na tur esnan ku a duna un man pa esaki resultá un éksito asina grandi.