Randhy Cuevas ku hazaña pa subi Seru Kristòf 13 biaha djadumingu mardugá 

9-01-2017
Randhy Cuevas ku hazaña pa subi Seru Kristòf 13 biaha djadumingu mardugá 

WILLEMSTAD – Loke lo dominá gran parti di e fin di siman binidero ta un hazaña inmenso di e deportista di kurason Randhy Cuevas pa den mardugá di djasabra 14 pa djadumingu 15 di yanüari subi Seru Kristòf 13 biaha. Ku esaki e ke yuda e fundashon Ride for the Roses Curaçao (RFTRC) rekoudá por lo ménos 13 mil florin èkstra pa e bon kousa, esta kombatimentu di kanser i guia na pashènt di kanser i nan famia. Eksaktamente dos siman despues, riba djadumingu 29 di yanüari, e di 13 edishon di aktividat masal di Ride, Swim i Walk for the Roses ta tuma lugá.

En prinsipio Randhy Cuevas ta efektuá e hazaña aki, ku nan a yega di yama tambe ‘The Climb for the Roses’, e so. Solamente esnan ku ta dispuesto pa kontribuí minimalmente 1000 florin na e fundashon RFTRC tambe por subi e seru e mardugá ei. 
Na 2014, na okashon di e dies aniversario di Ride for the Roses, Randhy Cuevas a dominá e seru mas haltu di Kòrsou dies biaha, tambe pa rekoudá fondo pa RFTRC. Den su karera deportivo i komo esfuerso ekstremo Randhy Cuevas a subi e seru aki sigur 4000 biaha kaba.

Randhy Cuevas: “A base di e pensamentu ku nos tur por yuda, promové i konsientisá hende ku e bataya kontra kanser nunka ta pòrnada, i ku kanser no ke men e final, mi a disidí pa hasi algu mi mes pa mustra kiko ta perseveransia, sigui bai i traha huntu pa yega na un meta. E esfuerso pa yega ariba simbólikamente ta komparabel ku kon un hende ta sinti ora e haña tratamentu pa kura di kanser. Anto si mester ripití e tratamentu, mester subi e seru mas biaha, ta hasi mester hasié. Mi esfuerso di fin di siman binidero lo ta hopi pisá, pero ñaña kompará ku e bataya kontra kanser“.

Patrosinadornan
E patrosinadornan ku ya a mèldu pa e evento spesial aki ta Criss Cross Cycling Tours, Marina Real, fundashon Carmabi/Parke Kristòf, fundashon KJ (Kenley Jansen) Hoops i RFTRC su spònser prinsipal ORCO Bank. Mas patrosinador tambe ta bon biní i nan por depositá nan kontribushon na kuenta # 104.874.0395 di Orco Bank na nòmber di Stichting Ride for the Roses menshonando ‘Climb for the Roses’. Pa deseonan spesial por tuma kontakto ku miembro di direktiva Arthur Rosaria na number di telefon 510-8789. Ademas tin manera semper e koperashon di Krus Kòrá, e Fundashon Kuido Ambulans, Selikor i Fondo Prinsesa Wilhelmina na kua tur fondo ta bai finalmente.