Di djestres edishon di Ride, Sail, Swim, Walk for the Roses 29 di yanüari 2017

7-11-2016
Di djestres edishon di Ride, Sail, Swim, Walk for the Roses 29 di yanüari 2017

Di djestres edishon di Ride, Sail, Swim, Walk for the Roses 29 di yanüari 2017

WILLEMSTAD – Awor ku a stipulá e fecha di 29 di yanüari 2017 pa e di 13 edishon di Ride, Sail, Swim & Walk for the Roses, e mas ku 10.000 partisipantenan por fiha nan entrenamentu. E tema sentral dje aña aki ta ‘Making a difference together’. E promé paso pa un programa eksitoso nobo di aktividat pa sostené kombatimentu di kanser, ta e estreno lokal di e pelíkula dia 1 di desèmber awor di Sully, e storia real di e piloto ku na 2009 a hasi un aterisahe di emergensia den e riu Hudson. Esaki i muchu mas informashon a bini dilanti djaluna durante e anual konferensia di prensa estilo kick-off pa Ride for the Roses den kurá di Landhuis Cerrito di e patrosinador prinsipal ORCO Bank.

Pa e akshon mas grandi na Kòrsou pa rekoudá fondo e meta primordial ta i ta keda pa logra mas tantu plaka posibel pa e fondo Prinsesa Wilhelmina (PWF). Ya for di 2005 e fundashon RFTRC (Ride For The Roses Curaçao) ta limitá na organisá diferente evento únikamente pa alkansá mas tantu hende i mas tantu spònser i donatùr pa rekoudá mas tantu fondo posibel pa PWF. E fundashon aki tin un planifikashon di término i un bista kompleto unda tin mas mester i kaminda e hendenan ta ku mester di e sosten urgentemente, i e ta usa e sèn pa duna guia na pashènt di kanser i nan famia i pa kombatí e malesa aki.
E direktiva di RFTRC presidí pa Robbin Martina ya ta ful den preparashon pa e edishon nobo bira un éksito finansiero grandi atrobe. E otro miembronan di direktiva ta Benno van Leeuwen, Jim van Luipen, Curd Evertsz, Geert Bijlstra, Raoul Hooftman, Helena Seferina, Arthur Rosaria i e nobato den direktiva Stephan Veen. Nan por konta ku sosten den e diferente rangonan  formá pa voluntarionan ku kada un sin interes propio ta disponibel na interes di e bon kousa. Nan por kai bèk di nobo riba respaldo di tremendo patrosinador ku ORCO Bank ketu bai komo spònser prinsipal.

Pelíkula Sully
E promé parti di e programa di aktividat ta presentashon riba djaweps dia 1 di desèmber di e pelíkula Sully ku a sali resientemente durante un anochi festivo den e teater The Cinemas na Riffort. Esaki ta e storia real di e kapitan di US Airways Chesley ‘Sully’ Sullenberger ku na 2009 a skapa bida di 155 hende ora el hasi un aterisahe di emergensia eksitoso den e riu Hudson despues ku paranan a dal den ámbos motor di e djèt ratu despues ku nan a lanta for di aeropuerto La Guardia na New York. Benta di karchi pa e anochi di sine aki ta kuminsá e siman aki na rason di 50 florin pa persona. Pa e anochi mes ta prepará un programa apropiá i sigur tambe masha interesante ku un orador invitá spesial. E fondonan di e presentashon aki manera kustumber ta destiná pa PWF.

Djadumingu 29 di yanüari 2017
Meskos ku den e último añanan ta spera atrobe mas ku 10.000 partisipante pa e diferente elementonan di e evento grandioso riba dia 29 di yanüari 2017. Nan a hinka kada un di e elementonan di e evento aki den un bachi deportivo, pero partisipashon di mas tantu hende posibel ta mas importante ku e elemento kompetitivo: riba baiskel, den barku di bela, den landamentu, den kanamentu, pero tambe den ‘spinning’.

Tempran e mainta míles di kanadó ta kuminsá for di Awasá pa sea atraves di brùg Emma òf esun haltu brùg Juliana pasa den kayanan di Punda, Pietermaai, Marie Pompoen pa Mambo Beach Boulevard. Famianan kompleto ta partisipá. Djis despues e koredónan di baiskel ta start pa e diferente distansianan riba kaminda pero tambe pa un ruta di mountainbike. E salida i final di e karedanan aki tambe ta na Mambo Beach Boulevard. E landadónan ta drenta laman na Jan Thiel pa sali bèk na e playa di Mambo Beach Boulevard. Na e mesun playa ta tuma lugá atrobe e tan popular Spinergy: un aktividat deportivo intensivo riba e baiskelnan di spinning kaminda empresanan por kompetí ku otro i kombiná prestashonnan deportivo ku rekoudashon di fondo. E biaha aki e elemento ‘Sail’ ta den e programa atrobe. Despues lo publiká e detayenan di kada un di e elementonan aki.

E akshon di 'Standing Order'
Tur aña e fundashon ta konta di por rekoudá sufisiente fondo ku ta asina nesesario pa yudansa i sosten na e pashèntnan di kanser na Kòrsou. Parti di e kampaña kontinuo ta tambe pa reklutá e asina yamá ‘donatùrnan fiho’ ku atraves di un transferensia outomátiko tur luna/aña ta transferí un suma fiho for di nan kuenta bankario pa e ekselente kousa aki. Esaki tambe a resultá un éksito grandi i p‘esei ta sigui kuné bayendo e edishon di 2017. Na RFTRC nan tin e formularionan pa por regla e ‘standing order’ aki di un forma optimal.