Aktividatnan di Ride for the Roses den di-15 aña repartí riba fin 2018 i hinté 2019

11-10-2018
Aktividatnan di Ride for the Roses den di-15 aña repartí riba fin 2018 i hinté 2019

Aktividatnan di Ride for the Roses den di-15 aña repartí riba fin 2018 i hinté 2019

KOMUNIKADO DI PRENSA

Dia 11 di òktober 2018

 

Estreno di ‘Bohehian Rhapsody’ dia 1 di novèmber na Cinemas

 

WILLEMSTAD – Djaweps a atardi den kurá di e patrosinador prinsipal Orco Bank, direktiva di fundashon Ride for the Roses a duna prensa, patrosinador i voluntarionan un idea di e aktividatnan ku tin den tapara pa e di-15 edishon di Ride, Sail, Swim & Walk for the Roses, Spinenergy inkluso, ku djadumingu 27 di yanüari 2019 konosé un momento kulminante. Miéntras ku e ekstoso akshon Standing Order 1500 km ta sigui, e próksimo aktividat ta e anochi di sine djaweps dia 1 di novèmber awor. Pero, durante sobrá di e aña di hubilo 2019 tambe tin aktividatnan planiá.

 

Fundashon Ride for the Roses Curaçao

RFTRC a start na 2005 ku e meta prinsipal pa sostené Fondo Prinsesa Wilhelmina (PWF) finansieramente. E instansia aki por usa e yudansa bon pa e sigui atendé ku pashènt di kanser i nan famia. Esaki a krese te bira e evento anual mas grandi pa rekoudá fondo na Kòrsou. E último añanan a logra semper pa rekoudá alrededor di mei mion florin pa e bon kousa, i esei ta bai p’e minimalmente atrobe den e aña di hubilo. Ya pa di tres aña Robbin Martina ta presidí e direktiva ku sosten di sekretario Benno van Leeuwen, tesorero Jim van Luipen, visepresidente Curd Evertsz, i ademas Geert Bijlstra, Raoul Hooftman, Maria-Helena Seferina, Arthur Rosaria, Stephan Veen i e relashonista públiko Frans Heiligers. Komo stazjèr e aña aki tin Stef Munsters.

 

E pelíkula Bohemian Rhapsody

E promé parti di e programa di aktividat ta presentashon dia 1 di novèmber awor di e pelíkula Bohemian Rhapsody, ku un dia despues nan ta estrená na Merka. Ta trata di un pelíkula biográfiko tokante e banda Britániko di rock Queen ku e legendario kantante Freddy Mercury. Dia 5 di sèptèmber 1946, Farrokh Bulsara a nase na Stone Town, na Tanzania. Despues ku el a muda pa Inglatera su pashon pa músika a bira bisto. Su koleganan studiante Brian May i Roger Taylor tabata en buska di un kantante pa nan banda. El a ofresé pa e bira i esei a resultá den e banda Queen. Farrokh a kambia su nòmber pa Freddy Mercury i e banda a kuminsá komponé piesa. Despues di seshonnan largu di grabashon pa Bohemian Rhapsody nan a bisa e banda ku e piesa aki ta dura muchu i nunka e no por bira un éksito. Kontrali a sosodé. Queen a bira un di e bandanan di rock mas grandi na mundu ku a logra hit un tras di otro. Na 1985 e banda a presentá ku éksito na e legendario konsierto di Live Aid. Nan a konstatá ku e kantante Mercury tabatin aids. Dia 24 di novèmber 1991 el a fayesé na Londres.

E benta di karchi na rason di 50 florin pa persona pa e sine Bohemian Rhapsody pa e presentashon di dia 1 di novèmber mitar di 8 di anochi den The Cinemas na Otrobanda, ya ta aden. E karchinan ta optenibel serka miembronan di direktiva di RFTRC, Van den Tweel Zeelandia, 24 uur uit de Muur na Santa Maria i Mensing’s Caminada.

 

Dia 27 di yanüari 2019

Riba djadumingu dia 27 di yanüari 2019 ta antisipá atrobe mas ku 10.000 partisipante na e diferente elementonan di Ride, Swim & Walk for the Roses. Anke e tin elemento di deporte, e idea ta mas pa atraé mas tantu hende posibel ku tur ta kontribuí nan granito.

Mainta tempran e miles di kanadó ta kuminsá na Awasá pa sea via brùg di ponton Emma òf e brùg haltu Juliana kana den e kayanan di Punda, Pietermaak, Marie Pompoen pa yega Mambo Beach Boulevard. Famianan kompleto ta tuma parti. Djis despues e koredónan di baiskel ta kuminsá pa e diferente distansianan, riba kaminda i tambe un ruta pa mountainbike. Nan salida i final tambe na ta Mambo Beach Boulevard. Pa mediodia e landadónan ta bula na awa na bahia Jan Thiel pa bai e playa di Mambo Beach Boulevard. Na e playa aki e tan popular Spinergy ta tuma lugá: un aktividat deportivo riba spinningbikes kaminda empresanan por kompetí ku otro konopando e prestashonnan deportivo na rekoudá fondo.

 

Akshon den e aña di hubilo

En konekshon ku e aña di hubilo direktiva ta hasi un apelashon riba persona i instansianan pa bini dilanti ku ideanan grasioso pa tene mas evento ‘... for the Roses’ durante e aña di hubilo pa asina rekoudá mas fondo. Despues di a studia e proposishonnan, direktiva di RFTRC ta drenta den kontakto ku e organisashon en kestion i ora yega na un akuerdo  e evento por apliká e agregashon ‘... for the Roses’. Por ehèmpel, tin e plan pa un ‘Golf for the Roses’ dia 20 di yanüari 2019; na su debido tempu lo suministrá mas detaye al respekto. Tin mas idea aden kaba, manera pa un ‘Zumba for the Roses’ i un ‘Fashion for the Roses’. Di e manera ei RFTRC ke mantené e atenshon durante henter aña riba e bon kousa. Persona i instansianan ku ke mèldu e evento ku nan tin pensá ‘… for the Roses’, por repasá tur e detayenan, inkluso e kondishonnan, riba e website www.ridefortheroses.net di RFTRC.