CrossFit for the Roses un reto nobo

27-01-2020
CrossFit for the Roses un reto nobo

CrossFit for the Roses un reto nobo

KOMUNIKADO DI PRENSA

Dia 27 di yanüari 2020

 

WILLEMSTAD – CrossFit ta un aktividat deportivo nobo – un método intensivo di entrenamentu pa atleta ku ta aktivo riba diferente tereno i ku ta hasi esaki pa drecha nan abilidatnan físiko pa loke ta forsa, rapides i agilidat. Un benefisio adishonal ta ku asina nan ta drecha nan kondishon, nan ta fet, nan ta pèrdè peso i nan kurpa ta lusi mas. Na Kòrsou tambe mas i mas hende ta praktiká esaki, pero hustamente pa su intensidat ta nesesario pa prepará i éntrená bon. Pa e mesun motibu aki en todo kaso no ta pèrmití pa esnan bou di 14 aña partisipá na CrossFit.

 

A agregá CrossFit na e programa di e di-16 Ride, Sail, Swim & Walk for the Roses. E kompetensia di CrossFit ta tuma lugá djadumingu 2 di febrüari for di 8 or di mainta na e playa di Mambo Beach/BLVD.

Meskos ku tabata e kaso ku e kompetensia di Spynergy den pasado, en prinsipio ta kompanianan ta partisipá na CrossFit for the Roses, pero gruponan ku partisipantenan individual tambe por partisipá. Importante ta pa nan yena e formulario di partisipashon, manera esun ku CrossFit Willemstad ya a manda pa un grupo selektá di empresa. E idea ta pa e formularionan yega serka Jean-Jamil Rojer na e direkshon di mail [email protected] E kordinadó aki di e elemento aki por duna tambe informashon adishonal na otro interesadonan.

 

Kima kaloria

Kada tim ta konsistí di minimalmente 5 i maksimalmente 8 atleta. Un workout ta dura 1 ora, loke ta nifiká ku mester hasi eherisisio sin stòp un ora largu. Tur empresa lo hasi bon pa nan tin sufisiente deportista kla pa por yena e ora ei i ku por keda den moveshon tur e tempu ei.

Kiko e atletanan ta hasi e dia ei? Durante e WOD (work-out of the day) di 1 ora e deportistanan ta ehekutá un kantidat di ehersisio, manera rema, kore baiskel, burpees, box jump over, ehersisio di KB, ehersisio di plate i ehersisio di medicine ball. E ganadónan di e ehersisionan intensivo aki ta e deportistanan di un tim ku huntu a kima mas tantu kaloria durante esun ora ei. Aparte ku e partisipantenan ta paga un sierto suma pa partisipá, e intenshon ta tambe pa nan yuda kontribuí na plaka a base di e kantidat di kalorianan ku nan a kima. No mester lubidá ku henter e pensamentu tras di Ride for the Roses, i CrossFit for the Roses pues tambe, ta pa generá fondo na fabor di e lucha kontinuo kontra kanser i pa tratamentu di pashènt di kanser i nan famianan.

Crossfit for the Roses no ta meramente un reto deportivo; e ta un reto tambe pa e organisadónan di e elemento spesífiko aki pa nan purba haña e mihó fórmula posibel pa e komperensia aki.