Animo grandi atrobe pa partisipá na Ride, Swim & Walk for the Roses

1-03-2016
Animo grandi atrobe pa partisipá na Ride, Swim & Walk for the Roses

Animo grandi atrobe pa partisipá na Ride, Swim & Walk for the Roses

WILLEMSTAD – E kambio di fecha di fin di yanüari pa fin di febrüari a krea sierto asuntu inkómodo pa e organisadónan, pero e ánimo di e partisipantenan i e grupo di voluntario na e di 12 Ride, Swim & Walk for the Roses riba djadumingu 28 di febrüari sigur no a sufri bou di dje. Ayera atrobe sigur mas ku 10.000 partisipante a kore, kana, kore baiskel i landa bou di guia debido pa e bon kousa: kolektá fondo pa e trabou balioso ku Fondo Prinsesa Wilhelmina (PWF) ta hasi i pa pashènt di kanser i nan miembronan di famia.

 

Direktiva di fundashon Ride for the Roses bou di presidensia di Robbin Martina, spònser prinsipal Orco Bank, patrosinadónan platinum Fundashon Bon Intenshon, Curaçao Port Services, Guardian Group, Gillette, Kooyman i Curoil i tur e otro  spònsernan, i e ehérsito di kolaborador i voluntario por wak bèk satisfecho riba e di-12 edishon di e evento aki. A base di un kalkulashon preliminar a rekoudá atrobe ku e evento aki alrededor di mei mion florin. Ta te ora a konta tur e ingresonan real i despues ku a kita e gastunan di organisashon por determiná eksaktamente e suma final eksakto. Den su maneho transparente na su debido tempu e fundashon lo sali pa dilanti ku esei.

 

Landadónan kompetitivo

Mainta 7 or na Awasá minister Etienne van der Horst a duna e inisio na e Walk for the Roses, sea via brùg Emma òf via brùg Juliana, pa Wet & Wild na Boulevard. El a elogiá e bon trabou di PWF pa kua tur loke ta rekoudá ta bai. E momento ei e tabata kompañá pa presidente di RFTRC Robbin Martina, presidente di PWF Alba Martijn i Gerente General Canword di spònser prinsipal Orco Bank.

Djis despues ku e promé koredornan a drenta pa banda di 8 or e promé koredónan di baiskel a sali, i e promé di nan a drenta bèk promé ku e último kanadónan a drenta. Esei a krea un aglomerashon interesante na entrada di Boulevard. Tantu e kanadónan komo e koredónan di baiskel a haña na yegada un resepshon grandioso i un rosa pa tur partisipante.

Despues di un retraso di alrededor un kuartu di ora pa duna tur hende un chèns algu despues di mediodia promé e landadónan kompetitivo di e diferente klupnan lokal a sali siguí 5 minüt despues  esnan rekreativo for di Jan Thiel pa e trayekto di 3 km te Seaquarium. Den e landadónan kompetitivo maskulino e tres proménan ku a drenta tabata Raim Michèl (1, 37:15:02), Isacar Paula (2, 37:32:46) i Kaelan Betrian (3, 37:40:31) i di e damanan tabata Tiareth Cijntje (1, 39:35:30), Fleur Bos (2, 42:56:91) i Esmee York (3, 43:18:50). Seguidamente un pa un e otro landadónan kompetitivo i rekreativo a subi playa dui Seaquarium apoyá pa e públiko presente. Kuartu pasá di 2 or tur hende tabata aden. E gruponan di Spinergy tambe a kontribuí na e resultado final. DJ Maarten Schakel a animá e públiko tantu na entrada di e Walk komo na playa. Aya manera kustumber DJ Boogieman, Rene Hurtado i Rhydd’m Band a pèrkurá pa e kompañamentu musikal, miéntras ku e banda di hóben Unlocked tambe a kontribuí na e bon ambiente,

 

Metanan alkansá

Presidente Robbin Martina di fundashon Ride for the Roses huntu ku su miembronan di direktiva Benno van Leeuwen, Jim van Luipen, Curd Evertsz, Geert Bijlstra, Raoul Hooftman, Helena Seferina, José Alves i Arthur Rosaria por wak bèk riba un evento eksitoso. Aki aya por mehorá algu i esei sigur lo tene kuenta kuné pa otro aña, pero na final di dia nan por konstatá ku orguyo ku a logra igualá e resultadonan di aña pasá, esta un kantidat di partisipante ku a surpasá 10.000 i fondonan brutu rekoudá ku atrobe a pasa mei mion florin, tur esaki pa e bon kousa. Pa e resultado final aki e organisadónan ta inmensamente gradesido na tantu su mes kolaboradornan komo e grupo di voluntario, i tambe polis, Wardakosta, Citro, Boulevard, Jan Thiel, Krus Kòrá i tur e patrosinadornan.